हामी सबैकाे संसारन्यूज

२७ चैत्र, काठमाडौं । स्वास्थ्य तथा जनसंख्या राज्यमन्त्री नवराज रावतले फेरि विद्यालय बन्द गरेर अनलाइनमार्फत पठनपाठन गराउनेबारे सोचिरहेको बताएका छन् । नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै उनले विद्यालयमा संक्रमण वृद्धि भएकाले विद्यालय बन्द गराएर अनलाइनमार्फत पठनपाठन गराउनेबारे पनि मन्त्रालयले सोचिरहेको जानकारी दिएका हुन्।

काठमाडौं र पोखरा लगायतका ठूला सहरमा रहेका विद्यालयमा संक्रमण वृद्धि भएकाले उच्च सतर्कता अपनाउन पनि स्वास्थ्य राज्यमन्त्री रावतले सुझाव दिएका छन् ।उनले अहिले नै मुलुकभर लकडाउन आवश्यक नदेखिएको पनि उल्लेख गरेका छन् । उनले लकडाउन कोरोना भाइरस नियन्त्रणको अचुक उपाय नभएकाले देशमा अहिले नै लकडाउन नगरिने बताउदैं सबैले भाइरसबाट बच्न उच्च सर्तकता भने अपनाउनुपर्ने उल्लेख गरेका छन् ।

स्वास्थ्य राज्यमन्त्री रावतले मातहतका निकायसहित मन्त्रालय कोरोनाको रोकथाम र नियन्त्रण गर्न काम गरिरहेको उल्लेख गरे ।उनले अहिले छिमेकी भारतमा कारोनाको दोस्रो लहर निकै बढेकाले सीमानाकामा कडाई गरिएको जानकारी दिए ।

स्वास्थ्य राज्यमन्त्री रावतले कोरोनाको संक्रमण नेपालमा फेरि उकालो लागेकाले सार्वजनिक स्थानमा मास्कको अनिवार्य प्रयोग गर्न तथा स्वास्थ्य मापदण्ड अपनाउन आम नागरिकहरुलाई आग्रहसमेत गरेका छन्। कोरोनाको बेलायती भेरिएन्ट नेपालमा फैलने क्रम बढेको भन्दै सरकारले जनस्वास्थ्यका मापदण्डमा कडाइ गर्न निर्देशन दिएको उनले बताएका छन्।