हामी सबैकाे संसारन्यूज

१.
मनको क्रोध भ्रमलाई भगाउन जान्यो भने
सन्तुष्टिको फूलमाला लगाउन जान्यो भने
जिन्दगी त्यसै सप्रिनेछ र सुवास छाउनेछ
मेहेनतको खोला सधैँ बगाउन जान्यो भने

२.
तिमीमा छुट्टै घमण्ड स्वार्थ अनि डाह थियो
मलाई भने ‘म’ जस्तै बन्ने निकै चाह थियो
तिमीले उचाल्न खोज्यौ तर प्रिय मान्दिनँ म
कारण हावामा उफ्रने पछारिन्छ थाह थियो

३.
लक्ष्यमा सधैँ केन्द्रित हुने स्थिर मन बनाउने छु
देख्दा सबैले डाह गरोस् यस्तो जीवन बनाउने छु
हिँड्ने छु म अनवरत, अँध्यारा गन्तव्य छिचोलेर
अनुभूति, अनुभवलाई आफ्नो साधन बनाउने छु

४.
खप्न मुस्किल पीडा छन् तिमीले सानो नसम्झिनु
आद्र छन् यी परेला तिमीले ओभानो नसम्झिनु
समयको चक्रव्यूहमा परि हामीले टाढा हुनु पर्यो
प्रिय तिमी मनमा नैं छ्यौ कतै विरानो नसम्झिनु

५.
आश्वासनका राँको बाल्नु हुन्छ धेरै
उद्रिएको विचारलाई टाल्नु हुन्छ धेरै
बुझ्दै छु हजुरका विज्ञानका कुरा मैले
सुन बनाउन फलाम गाल्नु हुन्छ धेरै