हामी सबैकाे संसारन्यूज

१.
वासन्ती वय मस्केर ओर्लिन् आज धराभरि
छप्पै सौन्दर्य पस्केर ओर्लिन् आज धराभरि !
जादूझैँ फक्रदै सत्य फूलमा ढुल्मुलाउँछिन्
भाग्छिन् शिशिर ठस्केर ओर्लिन् आज धराभरि !!

२.
प्रेमका पगरी छौ क्वै ? आओ साथ म हिड्दछु
मान्छे ! मानवता छौ क्वै ?लाओ साथ म हिड्दछु !
एक्लो गम्भीरता आफै भेटे मस्कन्छु मस्मस
काला छौ,म त्यता हुन्न जाओ साथ म हिड्दछु !!

३.
वास्ना मग्मगमा आइन् प्रेयसी हुन लायक
मोहनी दिलमा छाइन् प्रेयसी हुन लायक !
नाटके स्वाङमा गर्छन् हाउभाउ यता कति
एकै झलकमै पाइन् प्रेयसी हुन लायक !!

४.
परेलीमा चुहेको छ विन्दु सुन्दर शीतको
दिलभित्र वहेको छ सिन्दु सुन्दर शीतको !
सृष्टि सारा यिनैबाट चलेको छ चराचर
मान्छे हुन्छ सफा नित्य इन्दु सुन्दर शीतको !!

५.
फूलमा फूलकै थुङ्गा काँडामा भै यता कडा
फाँडिन्छन् यी जटाजुट जङ्गल छन् कता कडा !
यात्रा अनन्तमा पुग्न खुल्छन् बाटाहरू सबै
अप्ठेरा सजिलै बन्छन् छन् सामुमा जता कडा