हामी सबैकाे संसारन्यूज

वैशाख २, काठमाडौं । गण्डकी प्रदेशका मुख्यमन्त्री पृथ्वीसुब्बा गुरुङले आफुँविरुद्व अविश्वासको प्रस्ताव दर्ता गर्ने तयारी भएपछि प्रदेश सभाको अधिवेशन नै अन्त्य गरिदिएका छन् । प्रदेश मन्त्रिपरिषदको सिफारिसमा प्रदेश प्रमुख अमिक शेरचनले बुधबार मध्यरातीदेखि अधिवेशन अन्त्य गरेका हुन् ।

विपक्षी दलहरु नेपाली कांग्रेस र नेकपा (माओवादी केन्द्र)ले मुख्यमन्त्रीविरुद्व अविश्वासको प्रस्ताव ल्याउने तयारी गरेका थिए । विपक्षी दलहरुले बिहिबार हस्ताक्षर संकलनको तयारी थालेका थिए ।

अविश्वास प्रस्ताव आउने निश्चित भएसँगै गुरुङले सत्ता बचाउका लागि अधिवेशन अन्त्य गरिदिएका हुन् ।

६० सदस्यीय प्रदेश सभामा सत्तारुढ नेकपा (एमाले)को पक्षमा २७ सांसद छन् । एमाले इतरका दलहरुसँग बहुमत छ । नेकपा (माओवादी केन्द्र) र राष्ट्रिय जनमोर्चाले समर्थन फिर्ता लिएसँगै गुरुङ अल्पमतमा परेका थिए ।

यसबीच एमालेभित्रको आन्तरिक विवादका कारण पनि गुरुङ समस्यामा थिए । एमालेको माधव कुमार नेपाल पक्ष उनीविरुद्व खुलेर लागेको थियो ।