Sansar News
वैशाख २, काठमाडौं । गण्डकी प्रदेशका मुख्यमन्त्री पृथ्वीसुब्बा गुरुङलाई दिँदै आएको समर्थन स्वतन्त्र सांसद दीपक मनाङेले पनि फिर्ता लिएका छन् । मनाङ ‘ख’बाट निर्वाचित मनाङले अन्य दलले अविश्वासको प्रस्ताव दर्ता गरिरहेका बेला समर्थन फिर्ता लिएका हुन् ।
मनाङेले यसअघि नै गुरुङलाई समथर्न नगर्ने घोषणा गरेका थिए । उनले एमाले इतरको सरकार बनाउनु पर्ने बताउँदै आएका थिए ।
बिहिबार मात्रै नेपाली कांग्रेस, नेकपा (माओवादी केन्द्र) र जनता समाजवादी पार्टीका सांसदले मुख्यमन्त्री पृथ्वीसुब्बा गुरुङविरुद्व अविश्वासको प्रस्ताव दर्ता गराएका थिए । अविश्वासको प्रस्तावमा भावी मुख्यमन्त्रीको रुपमा कांग्रेस संसदीय दलका नेता कृष्णचन्द्र नेपालीलाई प्रस्ताव गरिएको छ ।
अविश्वासको प्रस्तावमा कांग्रेसका १५, माओवादी केन्द्रका ११ र जसपाका २ सांसदले हस्ताक्षर गरेका छन् । तीन सांसद रहेको राष्ट्रिय जनमोर्चाले पनि यसअघि नै अविश्वासको प्रस्तावमा मतदान गर्ने बताईसकेको छ ।
वि.सं.२०७८ वैशाख २ बिहीवार १५:२९ मा प्रकाशित
