हामी सबैकाे संसारन्यूज

असार १४, काठमाडौं । नेकपा (एमाले)को केपी शर्मा ओली पक्षीय नेतृ शान्ता चौधरीले कारबाहीमा परेका नेता माधवकुमार नेपाललाई पत्र लेख्दै पार्टीमा फर्किन आग्रह गरेकी छिन् । सोमबार सामाजिक सञ्जालमार्फत खुल्ला पत्र लेख्दै उनले यस्तो आग्रह गरेकी हुन् ।

नेता नेपाललाई ‘सीपी मैनाली’को पथमा नहिँड्न सुझाएकी छिन् । उनले कांग्रेससँग सहयोग मागेर राजनीतिक भविष्य नहुने पनि सुझाब दिएकी छिन् । कांग्रेससँगको मित्रता अन्ततः पतनको बाटो भएको उनको भनाई छ ।

चौधरीले खुल्ला पत्रमा माधव नेपाल कांग्रेसको जालमा निस्कनै नसक्ने गरि फसको टिप्पणी गरेकी छिन् । उनले कांग्रेसको बुई चढेर एमालेभन्दा ठूलो हुन्छु भन्ने नसोंच्न पनि सुझाएकी छिन् ।

यस्तो छ चौधरीको खुल्ला–पत्र

आदरणीय कमरेड माधव नेपाल
हार्दिक अभिवादन ।

नेकपा (एमाले ) को तपाईं आदरणीय नेता हुनुहुन्थ्यो , श्रद्धेय हुनुहुन्थ्यो ।

हेर्दा हेर्दै यति ठुलो बिचलन तपाईंमा देख्न पर्‍यो । फँस्नु भयो कमरेड फँस्नु भयो तपाईं । निस्क्नै नसक्ने गरि कांग्रेसको जालमा पर्नु भयो ।
शेरबहादुरलाई प्रधानमन्त्री बनाउने, त्यसपछि पार्टी विभाजन गर्न सजिलो पर्ने गरि शेरबहादुरले अध्यादेश ल्याइदिने, अनि तपाईंले पार्टी विभाजन गरिदिने, चुनावी सरकारको नेतृत्व तपाईंले गर्ने, आगामी निर्वाचनमा तपाईंलाई कांग्रेसले जिताईदिने, चुनावी गठबन्धन गर्ने, कांग्रेसले तपाईंलाई एमाले भन्दा ठुलो पार्टी बनाई दिने, वा कमरेड वा तपाईं सपना !

यो स्ट्याटस सुरक्षीत होस्, साथीहरु स्क्रिनसट गरेर राख्नुहोस्, पछि मलाई देखाउनु होस्, म चुनौती दिन्छु । निर्वाचन पछि तपाईं त्यहीँ पुग्नुहुन्छ जहाँ आज सिपी मैनाली छन् ।

कांग्रेसलाई आफैंभित्र सकस हुनेछ , आफ्नै पार्टीभित्रको गुटका लागि टिकटकाे भागबन्डा मिलाएर वितरण गर्न उसलाई आफैलाई सकस हुनेछ ।

तपाईंको पार्टीलाइ कांग्रेसले भाग छुट्याई दिने , प्रचण्डलाई छुट्याईदिने , बाबुराम उपेन्द्रलाई छुट्याएर दिने अनि कांग्रेसका मतदाताले तपाईंहरुलाई भोट दिएर जिताई दिने , वा कमरेड वा तपाईंको दिवा सपना । राष्ट्रियसभाको उपनिर्बाचन जस्तै ठान्नु भयो की क्याहो कमरेडले । कमरेडको राजनीति हेर्दाहेर्दै कांग्रेसको शरणमा .. भो कमरेड भो , पतनको बाटो नजानुहोस् ।