हामी सबैकाे संसारन्यूज

३ साउन, काठमाडौं । नेकपा माओवादी केन्द्रका अध्यक्ष पुष्पकमल दाहाल(प्रचण्ड) ले आगोसँग खेल्नु राम्रो नहुने भन्दै आगो फेरि सल्किन सक्ने हुनाले ख्याल गर्न अनुरोध गरेका छन् ।

प्रधानमन्त्री शेर बहादुर देउवाले संसदबाट लिन लागेको विश्वासको मतको विषयमा छलफलमा भाग लिएका अध्यक्ष प्रचण्डले माओवादी आन्दोलन केही होइन भन्ने नसोच्न भन्दै आगो फेरि सल्किन सक्ने चेतावनी समेत दिएका छन् ।

अध्यक्ष प्रचण्डले नेकपा एमालेका अध्यक्ष केपी शर्मा ओलीप्रति इंगित गर्दै नेकपा माओवादी आन्दोलन विभाजित छ । यसलाई मिचिदिन्छु भन्दै नसोच्न पनि आग्रह गरे ।

अध्यक्ष प्रचण्डले माओवादी आन्दोलन उत्पीडित समुदायको साझा आन्दोलन र आवाज भएकोले त्यो आवाजलाई मिचेर अगाडि बढ्न सहज नभएको समेत बताए ।
‘माओवादी विभाजित भएको छ । यसको ओज ताप पनि घटेको छ । यसलाई किचिदिए हुन्छ भन्ने लाग्यो हाम्रो साथिहरुलाई,’ अध्यक्ष प्रचण्डले भने, ‘मैले पटक–पटक भन्थे, आगोसँग खेल्नु त्यति राम्रो हुँदैन । आगोलाई ईनर्जिमा परिणत गर्नेतिर ल्याइएको छ । तपाईहरुले यसलाई हेप्न र अपमानित गर्न थाल्नु भयो भने आगो फेरि सल्किन सक्छ । त्यो बुद्धितिर हामी कोही नजाउँ ।’

उनले केपी ओलीप्रति इगित गर्दै व्यक्तिगत अहंकार र दम्भले इतिहास निर्माण नहुने भन्दै बनेको इतिहासलाई जवरजस्ती व्यक्तिवादी चरित्रले निमिट्यान्न पार्छु भन्नु बलन्डर गरेको र त्यसको फल ओलीले भोग्दै गएको र अझै भोग्दै जाने बताए ।

‘हामी अहिले नेतृत्वकर्ता नै जिउँदै छौं । त्यति सजिलो चिज होइन हामी । तपाईहरुले माइनस गर्न खोजेर अपमानित गर्न खोजेर यिनीहरु निमोठिन्छन् भन्ने ठानिएको हो भने नेपाली जनता, अझ उत्पीडित वर्ग जाति क्षेत्र, लिङ्ग, समुदाय, समावेशी सबैका आवाजहरुको प्रतिनिधित्व हो हामी ।’