हामी सबैकाे संसारन्यूज

३ साउन, काठमाडौं । नेपाल राष्ट्र बैंकले आर्थिक वर्ष २०७८/०७९ को मौद्रिक नीति तयारीकै चरणमा रहेको बताएको छ ।

आइतबार राष्ट्र बैंकका कार्यकारी निर्देशक तथा प्रवक्ता देवकुमार ढकालले मौद्रिक नीति तयारीकै चरणमा रहेको भन्दै उपयुक्त समयमा ल्याउने बताए ।

उनका अनुसार नीति निर्माणका सन्दर्भमा सरोकारवालाहरुसँग छलफल भईरहेको छ । पूर्व गभर्नरहरूसँग छलफल गर्न बाँकी नै रहेकोले सुझाव संकलन गरिरहेको र आन्तरिक तयारी गरिरहेको उनले बताए ।

‘आर्थिक वर्ष २०७८/७९ को मौद्रिक नीति निर्माणको क्रममा विभिन्न सरोकारवाला निकायहरुसँग सुझाव संकलन गर्ने कार्य हामीले सम्पन्न गरिसकेका छौँ । एक दुईवटा सरोकारवाला खासगरी पूर्व गभर्नरज्यूहरुसँग सुझाव संकलन गर्ने काम बाँकी छ । र सो सुझाव संकलनको आधारमा हामी मौद्रीक नीतिको निर्माणको आन्तरिक तयारी पनि सँगसँगै गरिरहेको अवस्था छ ।’ उनले भने ।

सरकारले आर्थिक वर्ष २०७८/०७९ बजेट अध्यादेशबाट ल्याएको र हाल सरकारसमेत परिवर्तन भएको सन्दर्भमा मौद्रिक नीति कहिले आउँछ भन्ने कुरा चासोको विषय बनेको छ ।

सरकारले पनि मौद्रिक नीतिका बारेमा केहि चासो राखेको छ । केहि समय धकेलिन सक्छ नीति पूर्व गभर्नरहरुसँग सुुझाब लिन बाँकी रहेको बताइए पनि राष्ट्र बैंकले मौद्रिक नीतिको लागि तयारी सकिसकेको छ । तर, अर्थमन्त्रालयमा नयाँ अर्थमन्त्री आएसँगै मौद्रिक नीति सार्वजानिक गर्न केहि ढिलाई भएको बताइन्छ ।

अर्थमन्त्री जनार्दन शर्माले गत शुक्रबार मात्रै पत्रकारसँगको भेटमा मौद्रिक नीतिको विषयमा छलफल भइरहेको जनाएका थिए । ‘सबै क्षेत्रका मागहरु छन्, ती सबै कुरा मौद्रिक नीतिमा समावेश हुनुपर्छ भन्ने छ, त्यसमा हामी छलफलमा जुटेका छौ’, शर्मा भनेका थिए ‘त्यो छलफलपछि मौद्रिक नीति आउने छ ।’

राष्ट्र बैंकले साउन ३ गते नै चालु आर्थिक वर्षको मौद्रिक नीति ल्याउने तयारी गरेको थियो । तर, नयाँ सरकार आएकै कारण मौद्रिक नीति सार्वजानिक गर्न केहि दिन ढिलाइ भएको हो । गत आर्थिक वर्षमा पनि केन्द्रिय बैंकले साउन २ गते नै मौद्रिक नीति सार्वजानिक गरेको थियो ।