Sansar News
साउन १४, काठमाडौं । लुम्बिनी प्रदेशमा सरकार परिवर्तन गर्न केन्द्रको सत्तारुढ गठबन्धन सक्रिय बनेको छ । प्रदेश प्रमुख परिवर्तन गरेसँगै गठबन्धन मुख्यमन्त्री परिवर्तन गराउन सक्रिय बनेको हो ।
शनिबारदेखि प्रदेशमा मुख्यमन्त्रीका लागि प्रस्तावित नेता कुलप्रसाद केसी ‘सोनाम’ र प्रदेश सभामुख पूर्णं घर्तीसहितको टोली काठमाडौंमा छ । टोलीले गठबन्धनका शीर्ष नेताहरुसँग छलफल गरिरहेको छ ।
अल्पमतमा भए पनि सरकार चलाईरहेका मुख्यमन्त्री शंकर पोखरेललाई अपदस्त गराउन गठबन्धन आन्तरिक तयारीमा छ । क्रमशः एक पछि अर्को कदम चालिरहेको गठबन्धनले पोखरेललाई थप कमजोर पार्न योजना बनाईरहेको छ ।
बिहीबार मात्रै पार्टीको आधिकारिकता पाएसँगै जसपाले मुख्यमन्त्री पोखरेललाई सघाईरहेका ३ मन्त्रीलाई पार्टीबाट कारबाही गर्दै सांसदबाट कारबाहीका लागि प्रदेश संसद सचिवालयमा पत्र पठाएको थियो ।
लुुम्बिनीमा पोखरेल बहुमत भए/नभएको पुष्टी नै नगरि बलपूर्वक वैशाख १९मा मुख्यमन्त्रीमा नियुक्त भएका थिए । नियुक्तीको दिनदेखि नै उनी अल्पमतमा छन् ।
८३ सदस्यीय प्रदेशसभामा बहुमत देखाउन ४२ सांसदको समर्थन चाहिन्छ तर उनीसँग सुरुदेखि नै मात्रै ३८ सांसद छन् । जसमध्ये २ सांसद गठबन्धनमा सहभागी माधवकुमार नेपाल पक्षका छन् ।
वि.सं.२०७८ साउन १४ बिहीवार १७:२४ मा प्रकाशित
