हामी सबैकाे संसारन्यूज

१
खै मैले के भनौँ र ? कुन बाटो गएछु
आफ्नै धड्कनले बिर्सेको मुटु भएछु ।
२
तिमी किन गल्ती गथ्र्यौ गरिबलाई रोज्ने
मन चोरेर फरार भयौ कहाँ हो खोज्ने ?
३
राँके भोकमा नपाएको भात भयौ तिमी
मृत बिरालो काखी च्यापी उक्लिएझैँ ठिमी ।
४
भनेकी हौ उ बेलामा यस्ता कुरा जान्दिनँ
जति नै प्रयास गर व्यर्थै मैले मान्दिनँ ।
५
पिआर देखी तिमीले शत्रुसँग साइनो जोड्यौ
मुटु भई रगतसँगको पवित्र नाता तोड्यौ ।
६
माछा पानी जस्तै हाम्रो चोखो जिन्दगी थियो
तिमी बत्ती म तेल बनी बलेको थ्यो दियो ।
७
चाँदीसरिका हिमाल अनि आकाशको विशालता
समुद्रको गहिराइ खोजिनँ र मैले तिमी कता ?
८
मुनामदन बन्ने वाचा खाएको दिन सम्झन्छु
आँधीबेहरी चल्छ मनमा तापनि म सहन्छु ।
९
तिम्रै मनको पिँजडामा जन्मकैद गर सानु
कसम छुट्ने छैन कैल्यै मुटु छोडी कहाँ जानूँ ?
१०
सुनका लागि हीरा गुमाउने मदन म होइन
प्रेमभन्दा महँगो केही छैन तिमी बुझ्दिनौ किन ?