हामी सबैकाे संसारन्यूज

भदौ १८, काठमाडौं । माधव कुमार नेपाल नेतृत्वको नेकपा (एकीकृत समाजवादी) पार्टीमा जान नेता वामदेव गौतमले एक पछि अर्को शर्त राख्न थालेका छन् । सह–अध्यक्षको प्रस्ताव अस्वीकार भएसँगै गौतमले जनताको बहुदलीय जनवाद (जबज)लाई मार्गदर्शक सिद्धान्त बनाउने र संघीयतालाई पुनर्संरचना गर्ने कुरा पार्टीले अगाडि बढाउनुपर्ने शर्त राखेका छन् ।

सहअध्यक्ष वा दुई वटा अध्यक्ष राख्ने प्रस्तावलाई माधव पक्षले ठाडै अस्वीकार गरे पछि गौतमले पछिल्लो समय सहअध्यक्ष नभए पनि वरिष्ठ उपाध्यक्ष पद दिनुपर्ने बताउँदै आएका छन् । गौतमले जबज अनिवार्य हुनुपर्ने शर्त तेर्साएका छन् ।

उनले नेपालको संघीयतालाई आधार बनाएर कतिपयले बहुजातीय, बहुभाषिक, बहुसांस्कृतिक, बहुधार्मिक र बहुक्षेत्रीयताको नारा दिईरहेको भन्दै व्यवस्थापन गर्ने गरि संविधानमै व्यवस्था गर्नुपर्ने बताएका छन् । उनले बहुराज्यमा लैजाने भड्काउलाई सहयोग गर्न नहुने बताएका छन् ।

गौतमले यसअघि पार्टी विभाजन गरे आफुँले साथ दिने वचन माधव पक्षलाई दिएका थिए । उनले पटक–पटक विभिन्न व्यक्तव्यमार्फत पार्टी विभाजन गर्न उत्साहित पनि गर्ने गरेका थिए ।