हामी सबैकाे संसारन्यूज

१८ भदौ, काठमाडौँ । बहुमुल्य जडीबुटि यार्सागुम्बाको अवैधरुपमा कारोबार गर्ने चार जना पक्राउ परेका छन् ।

महानगरीय अपराध नियन्त्रण महाशाखाले झण्डै रु ८० लाख मूल्य बराबरको यार्सागुम्बासहित चार जनालाई पक्राउ गरेको हो ।
अवैधरुपमा यार्सागुम्बाको कारोबार भइरहेको प्राप्त सूचनाका आधारमा महाशाखाको टोलीले काठमाडौँको सामाखुशीबाट उनीहरुलाई पक्राउ गरेको हो ।

पक्राउ पर्नेमा गोरखाका काठमाडौँको मित्रनगर बस्ने डुण्डुप गुरुङ, लमजुङका नयाँ बसपार्क बस्ने बेलबहादुर थापा र बानियाटार बस्ने कृष्ण परियार र प्यूठानका तारकेश्वर बस्ने दानबहादुर जिसी रहेका छन् ।

गुरुङको कोठा खानतलासी गर्दा बिक्री गर्न लुकाइछिपाइ राखेको अवस्थामा यार्सागुम्बा फेला परेको थियो । पक्राउ परेका चारै जनालाई आवश्यक कारवाहीका लागि शुक्रबार डिभिजन वन कार्यालय काठमाडौँमा बुझाइएको महाशाखाले एक सूचना जारी गरी जनाएको छ ।

उनीहरुको साथबाट एक किलो ८५० ग्राम यार्सागुम्बा समेत बरामद गरिएको छ ।
रासस