हामी सबैकाे संसारन्यूज

२० भदौँ, काठमाडौँ । नेपाल र भारतबीचको दोस्रो मैत्रीपूर्ण खेल आज त्रिपुरेश्वरस्थित दशरथ रंगशालामा हुन गईरहेको छ ।

नेपाल र भारतले आगामी महिना माल्दिभ्समा हुने साफ च्याम्पियनसिपको तयारीका लागि मैत्रीपूर्ण खेल खेलेका हुन् । यी दुई टिम बिच बिहिबार भएको पहिलो मैत्रीपूर्ण खेल १-१ गोलको बराबरीमा सकिएको थियो ।

नेपाल र भारबीच फुटबलमा २० पटक भिडन्त भएको छ । भारत १३ पटक विजयी भएको छ भने नेपालले दुई चोटी मात्र जित निकाल्न सकेको छ । पाँच खेलमा दुवै टोलीले बराबरी खेलेका छन् । विश्व फुटबल महासङ्घको (फिफा) वरियतानुसार भारत १०५ औँ स्थानमा छ भने नेपाल १६८ स्थानमा रहेको छ ।

एन्फाका अनुसार भारतसितको मैत्रीपूर्ण खेलपछि नेपाली टोली दक्षिण एसियाली फुटबल प्रतियोगिता (साफ) को तयारी गर्न कतारको दोहा जाने छ । नेपाली टोली यही भदौ २५ गते दोहा प्रस्थान गर्ने तय भएको छ । साफ च्याम्पियनसिप आगामी असोज असोज १५ देखि ३० गतेसम्म माल्दिभ्समा आयोजना हुँदै छ ।

यी दुई टिम बिचको खेल नेपाली समय साँझ ५:३० बजेबाट सुरू हुनेछ । नेपाल भारतबिचको खेलको प्रत्यक्ष प्रसारण हिमालय टेलिभिजन मार्फत हेर्न सकिनेछ ।