हामी सबैकाे संसारन्यूज

काठमाडौं । यातायात व्यवस्था विभागले मंगलबारदेखि सवारी चालक अनुमति पत्र (लाइसेन्स)को नयाँ आवेदन खुलाएको छ । दोस्रो चरणको कोरोना महामारी फैलिएसँगै गत वैशाख १६ गतेदेखि लाइसेन्सको नयाँ आवेदन बन्द थियो।

यातायात व्यवस्था विभागका प्रवक्ता डा। लोकनाथ भुसालले जानकारी दिएअनुसार आवेदन यसअघिको जस्तै विभागको वेभसाइटमा गएर भर्न सकिनेछ । अहिले भरेको आवेदनको पालो चार÷पाँच महिनापछि आउने उनले जनाए ।

कसरी भर्ने ?

विभागले जनाएअनुसार सेवाग्राहीले यसअघि जस्तै विभागको वेभसाइटमा गएर आवेदन दिन सक्नेछन् । आवेदन बिहान ६ बजेदेखि राती १० बजेसम्म दिन सकिने विभागले जनाएको छ ।

फर्म भर्नको लागि विभागले बेग्लै वेभपेज बनाएको छ । विभागको साइट खोलेपछि अनलाइन सवारी चालक अनुमति पत्र प्रणाली लेखिएको लिंक क्लिक गरि त्यसपछि खुल्ने पेजमा अनलाइन ड्राइभिङ लाइसेन्स रजिस्ट्रेसनमा गएर विवरण भर्नुपर्नेछ ।

अनलाइन ड्राइभिङ लाइसेन्स रजिस्ट्रेसन क्लिक गरेपछि खुल्ने नयाँ पेजमा नयाँ लाइसेन्स, लाइसेन्स रिन्यू, वा प्रतिलिपी मध्य एक अप्सन छानेर तल प्रोसिड लेखिएको बटनमा क्लिक गर्नुपर्नेछ । त्यसपछि व्यक्तिगत विवरण भरेर आफूलाई पायक पर्ने परीक्षा केन्द्र छानेर सबमिट गर्नुपर्नेछ ।

अहिले भरेको आवेदनको पालो चार/पाँच महिनापछि मात्रै आउने हुनाले सूचना हेरेर तोकिएको स्थानमा गएर ट्रायल दिनुपर्नेछ ।