हामी सबैकाे संसारन्यूज

काठमाडौं । गैरआवासीय नेपाली सङ्घको भाषा, साहित्य, संस्कृति तथा सम्पदा प्रवद्र्धन समितिले यसैवर्ष स्थापना गरेको ‘अरनिको अन्तराष्ट्रिय पुरस्कार’ लेखक हरि अधिकारीलाई प्रदान गरिएको छ ।

शताब्दी पुरुष सत्यमोहन जोशीको निवास ललितपुरको, बखुम्बहालस्थित लोकसाहित्य भवनमा शनिवार आयोजित एक कार्यक्रमका बीच अरनिकोको सम्मानमा स्थापित ‘अरनिको अन्तराष्ट्रिय पुरस्कार’ लेखक अधिकारीको ‘संकलित गद्य रचना २०७७’ कृतिलाई प्रदान गरिएको हो ।

एनआरएनएकमा अध्यक्ष कुमार पन्त, पूर्वअध्यक्ष जिवा लामिछाने, उपाध्यक्ष रविना थापा, साहित्यकार नयनराज पान्डेय तथा साहित्यकार, पत्रकार एबम एनआरएन प्रतिनिधिहरुको उपस्थितिमा आयोजित उक्त सम्मान कार्यक्रममा भाषा, साहित्य, संस्कृति तथा सम्पदा प्रवद्र्धन समितिका संयोजक हिक्मत थापाले अधिकारीलाई दुइ लाख रुपैयाँको चेक हस्तान्तरण गरेका थिए ।

उक्त कार्यक्रममा शताब्दी पुरुष सत्यमोहन जोशीले लेखक अधिकराीलाई प्रमाणपत्र दिँदै कलाकार अरनिको नै पहिलो एनआरएन भएको बताए । शताब्दि पुरुष जोशीले अरिनकोको नाममा साहित्यिक पुरस्कार राखेर गैरआवासीय नेपाली संघले निकै उदाहरणीय कार्य गरेकोमा प्रशंसा समेत गरे ।

सोहि कार्यक्रममा एनआरएनएका पूर्वअध्यक्ष जीवा लामिछानेले विदेशमा बसेर साहित्य सिर्जनामा लागिपरेका नेपाली स्रष्टाहरूका लागि पुरस्कार स्थापना गरिएको बताउँदै पुरस्कार रकममा बृद्धि गर्दै लैजाने जानकारी समेत दिए ।

त्यस्तै साहित्यकार नयनराज पाण्डेयले अमेरिका बस्दै आएका लेखक अधिकारीका कविताहरु चोटिला छन् निबन्ध पनि उत्तिकै खरो रहेको भन्दै प्रसंसा गरेका थिए ।