हामी सबैकाे संसारन्यूज

काठमाडौं । नेकपा (एकीकृत समाजवादी)का अध्यक्ष माधवकुमार नेपालले नयाँ नेपाल निर्माणका लागि मिलेर अगाडि बढ्नुपर्ने बताएका छन् । नेकपा माओवादी केन्द्रको आठौं महाधिवेशनमा सम्बोधन गर्ने क्रममा अध्यक्ष नेपालले मूल कुरामा सहमति भएपछि बाँकी कुरालाई थाती राख्न सकिने बताए ।

‘अहिले पनि एकताबद्ध भएर जानुपर्ने आवश्यकता छ । मूल कुरामा सहमति छ भने बाँकी कुरालाई थाती राख्न सकिन्छ’, अध्यक्ष नेपालले भने, ‘इतिहास अगाडि बढिसकेको छ, पछाडि फर्किन सम्भव छैन ।’

अध्यक्ष नेपालले माओवादीसँग आफूहरूको मन मिलेको पनि बताएका छन् । ‘तपाईंहरूसँग मन मिल्यो। मन मिलेपछि अरू केही चाहिँदो रहेनछ। मन मिलेपछि भावना मिल्दै जाँदो रहेछ’, उनले भने।

उनले पार्टीहरूभित्र पनि नेपाली समाजवाद कस्तो हुने भन्ने छलफल हुनुपर्ने बताएका थिए। उनले शोषण तथा उत्पीडन अन्त्य हुनुपर्ने पनि बताए।

साथै शिक्षा, स्वास्थ्य तथा रोजगारका समस्या समाधान गरिनुपर्ने पनि उनले बताए। यस्ता समस्या कायमै राखे समृद्धि हासिल नहुने उनले बताए।