हामी सबैकाे संसारन्यूज

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले पार्टीको समग्र विकासका लागि आफु सच्चिन तयार रहेको स्वीकारेका छन् ।

नेकपा माओवादी केन्द्रको आइतवारदेखि सुरुभएको आठौं महाधिवेशन उद्घाटन सत्रमा अध्यक्ष प्रचण्डले यो महाधिबेशनबाट आफुहरुले आत्मालोचना गर्न चाहेको बताउँदै आफु सच्चिन तयार रहेको बताएका छन् ।

अध्यक्ष प्रचण्डले शान्ति प्रक्रियामा आएपछि विचार, संगठन, संरचना तथा रणनीति र कार्यनीतिमा आफुहरु कहाँ कहाँ चुक्यौ भन्ने विषयमा समिक्षा गर्नुपर्ने र सबैभन्दा बढी आत्मसमिक्षा आफ्नै बारेमा गरेको बताएका छन् ।

‘तपाईहरुले त्यो प्रतिवेदन पारित भइसकेपछि देख्नुहुनेछ जनयुद्धको तयारी र नेतृत्व गर्ने अवसर मलाई जुट्यो । शान्ति सम्झौतामा हस्ताक्षर गर्ने १२ बुँदे समझदारी गर्ने, संयुक्त जनआन्दोलन उठाउने, संविधानसभाबाट संविधान निर्माण गर्ने, प्रधानमन्त्रीले जसरी भन्नु भयो यो सबै अवसर मलाई जसरी प्राप्त भयो भने अहिले माओवादी आन्दोलन तथा पार्टी कमजोर जस्तो देखिनुमा मैले अरुलाई आरोपित गरेर हुँदैन,’ अध्यक्ष प्रचण्डले भने, ‘मैले प्रमुख नेताको हैसियतले म भित्र नै खोज्नुपर्छ भनेर मैले आफैलाई चिरफार गरेको छु ।’