हामी सबैकाे संसारन्यूज

१

नातागोता अन्य कैयौं, पात्र भेटिन्छन् ।
जस्तो खोज्यो विविधता, शास्त्र भेटिन्छन् ।
मातापिता, समय र, मित्र यत्ति कुरा,
जीवनमा एकैपटक, मात्र भेटिन्छन् ।

२

बारी, पाखा, पखेरा र, डाँडाबीच फुल्छ ।
रहर भए गमला र, भाँडा बीच फुल्छ ।
जति बाधा आएपनि, संघर्षमा उत्री,
गुलाफको फूल सधैं,काँडाबीच फुल्छ ।

३

सभा होस् या त मेला, त्यसै हाँस्नुहुन्न ।
त्यस्तै बेला या कुबेला, त्यसै हाँस्नुहुन्न ।
दुर्योधन र द्रौपदीको ,दशा कस्तो भयो ?
ब्यर्थै परिन्छ नि फेला, त्यसै हाँस्नुहुन्न ।

४

केही गर्न सकिएन,यस्तै छ यो जिन्दगी ।
बाँच्नलाई झोला भर्न, ब्यस्तै छ यो जिन्दगी ।
कस्तो होला संसार भोलि ? हेर्न केही वर्ष,
म्याद थप्न बिन्तिपत्र,पेस्तै छ यो जिन्दगी ।

५

हजारौंमा छानिराखौं,पर्खिँदैन कहिले ।
सत्य यही हो ठानिराखौं,पर्खिँदैन कहिले ।
समय र मृत्यु, उमेर, तीन कुराले नि,
हामी यत्ति जानिराखौं,पर्खिँदैन कहिले ।

शिव अधिकारी ‘इलामे जेठो’
माई नगरपालिका –१०, लुम्बाक,इलाम