हामी सबैकाे संसारन्यूज

काठमाडौं । रुसी सैनिकहरू युक्रेनको राजधानी कीभमा प्रवेश गर्ने सहरको उत्तरी भाग ओबोलोनमा पुगेका छन् । यो क्षेत्र संसद र शहरको केन्द्रीय क्षेत्रबाट मात्र नौ किलोमिटर टाढा छ।

बीबीसीले उल्लेख गरेअनुसार रुसको आक्रमणपछि युक्रेनले आफ्नो सम्पूर्ण शक्तिका साथ जवाफ दिने प्रयास गरिरहेको छ । त्यसैले, राजधानी कीभ वरपरका क्षेत्रहरूमा ठूलो लडाई भइरहेको छ।

सहरको बाहिरी भागमा रहेको एयरफिल्डमा युक्रेनी र रुसी सेनाबीच झडप जारी छ । यदि रुसी सेनाले यो एयरफिल्ड कब्जा गरेमा त्यहाँबाट राजधानी प्रवेश गर्ने बाटो पाउन सक्छ।

रुसी सेना राजधानी प्रवेश गरेसँगै यूक्रेनको पूर्वी, उत्तरी र दक्षिणी क्षेत्रमा ठूलो भिडन्त भएको खबर आएको छ । कीभमा धेरै विस्फोटहरू भएका छन् ।

युक्रेनी शहरहरूमा मिसाइलको वर्षा

युक्रेनले अहिलेसम्म लडाईँमा परि सर्वसाधारण र सैनिकसहित १३७ जनाको ज्यान गएको जनाएको छ । संयुक्त राष्ट्रसंघको अनुमानअनुसार हालसम्म एक लाख मानिस घरबार छोडेर भागेका छन् । बिहीबार राति मात्रै पोल्याण्डको दक्षिण(पूर्वी सहर प्रजेमिस्लमा एक हजार मानिस रेलबाट पुगेका थिए ।

अहिले युक्रेनी सहर र यसका सैन्य अखडाहरूमा लगातार हवाई आक्रमण भइरहेको छ। मिसाइल वर्षा भइरहेको छ। युक्रेनी सीमाका तीनै तर्फबाट ट्याङ्कहरू अगाडि बढिरहेका छन्।

यद्यपि युक्रेनका राष्ट्रपति जेलेन्स्कीले आफू लडाइँ जारी राख्ने बताएका छन् ।

यसबीच, टेलिभिजनमार्फत लडाइँको घोषणा गर्दै रुसी राष्ट्रपति भ्लादिमिर पुटिनले कुनै पनि देशले यसमा हस्तक्षेप गरे इतिहासमा अहिलेसम्म नदेखेको नतिजा आउने बताएका छन् ।