हामी सबैकाे संसारन्यूज

काठमाडौं । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले नेकपा (माओवादी केन्द्र)का नेता नारायणकाजी श्रेष्ठलाई भेटेका छन् । बुधबार बिहान श्रेष्ठ निवास हात्तिवनमै पुगेर विप्लवले श्रेष्ठलाई भेटेका हुन् ।

एमसीसी सम्झौतालाई लिएर माओवादी केन्द्रभित्र अन्तरसंघर्ष चर्किरहेको बेला दुई नेताबीच भएको भेटवार्तालाई अर्थपूर्णं रुपमा लिइएको छ ।

नेता श्रेष्ठ एमसीसीको विपक्षमा उभिएकै कारण माओवादी केन्द्रभित्र ठूलो मतभेद छ । पार्टी अध्यक्ष पुष्पकमल दाहाल ‘प्रचण्ड’ले नेता श्रेष्ठलाई सोमबार पत्रकार सम्मेलनमार्फत नै मत नमिले पार्टी छाडेर जान सुझाएका थिए ।

प्रचण्डको अभिव्यक्तिसँगै नेता श्रेष्ठ पार्टीबाट अलग हुने गरि तयारीमा छन् । उनको तयारीका बीच विप्लव भेट्न पुगेका हुन् ।

विप्लव र श्रेष्ठबीच एमसीसीको विषयमा समान धारणा छ । पछिल्लो राजनीतिक घटनाक्रममा समान धारणा राख्ने दुई नेताबीचको भेटवार्तालाई राजनीतिक सहकार्य हुनसक्ने सम्भावनाको रुपमा अर्थाइएको छ । यद्यपि, दुई नेताबीच के–के विषयमा कुराकानी भएको थियो भन्ने कुरा बाहिर खुलाइएको छैन् ।