हामी सबैकाे संसारन्यूज

काठमाडौं । माधव नेपालसहितका १४ सांसदविरुद्ध एमालेका अध्यक्ष केपी शर्मा ओलीले दायर गरेको रिटलाई पूर्ण सुनुवाइका लागि पठाउने आदेश भएको छ । आइतबार न्यायाधीशद्वय ईश्वर खतिवडा र कुमार रेग्मीको संयुक्त इजलासले उक्त रिटलाई पूर्ण सुनुवाइका लागि पठाउने आदेश दिएको हो ।

ओलीले नेपालसहित १४ सांसदमाथि कारवाही गरेका थिए । तर, सभामुख सापकोटाले कारबाहीलाई पार्टी दर्ता भइसकेको भन्दै मान्यता दिएनन् । आफूले कारवाही गरेका १४ सांसदलाई फरक पार्टीमा सांसदको मान्यता दिएको, कारबाहीपछि नै निर्वाचन आयोगले एकीकृत समाजवादी पार्टी दर्ता गरेकोलगायतका विषयलाई लिएर ओली सर्वोच्च अदालतमा पुगेका थिए ।

एमाले अध्यक्ष ओलीले गत भदौ १७ सर्वोच्चमा रिट दायर गरेका थिए । यसअघि यो मुद्दा निरन्तर स्थगन हुँदै आएको थियो ।

ओलीको रिट आइतबार १२ औं पटक पेसीमा चढेको हो । यसअघि ११ पटकसम्म चढेको पेसीमा पहिलोपटक कारण देखाउ आदेश जारी भएको थियो भने दोस्रो पटकको आदेशमा सक्कल कागजात झिकाउने आदेश भएको थियो । त्यसपछिको अधिकांश पेसी हेर्न नभ्याउनेमा परेको थियो भने फागुन १ गतेको पेसी महान्यायाधिवक्ता कार्यालयबाट स्थगित भएको थियो ।

प्रमुख प्रतिपक्षी एमालेले यही विषयलाई नै लिएर संसदमा निरन्तर अवरोध गर्दै आएको छ । एमालेले १४ सांसदको राजीनामा वा सभामुखको राजीनामा भन्ने अडान राखिरहेको छ ।

सम्बन्धित समाचार

माधव नेपालसहित १४ जनाविरुद्व दायर मुद्दाको आज सुनुवाई हुँदै