हामी सबैकाे संसारन्यूज

काठमाडौं । पाकिस्तानका प्रधानमन्त्री इमरान खानको भाग्यको फैसला आज हुने भएको छ । अपराह्न ४ बजे पाकिस्तानको राष्ट्रिय सभामा उनको सरकारविरुद्ध अविश्वासको प्रस्ताव पेश हुनेछ । मिडिया रिपोर्ट र विपक्षीको दाबीअनुसार उनको सरकार अल्पमतमा परेको छ ।

इमरान खानले आइतबार विशाल र्‍याली निकालेर विपक्षी नेताहरूमाथि निकै आक्रोश पोखेका थिए। अर्कोतर्फ, आज विपक्षी दलको संयुक्त सभा पनि हुँदैछ ।

पाकिस्तानको संसदमा सोमबार हुने अविश्वासको प्रस्तावमार्फत बहुमत प्रमाणित गर्न नसकेमा इमरान खानले आफ्नो कुर्सी गुमाउने छन् । यसरी समयअघि नै कुर्सी गुमाएका पाकिस्तानका प्रधानमन्त्रीमा उनको नाम पनि पर्नेछ । उनको सरकार ढल्ने सम्भावना प्रबल छ किनभने उनका आफ्नै पार्टीका धेरै सहकर्मी र गठबन्धन पार्टीहरू उनीविरुद्व विद्रोह गरेका छन् ।

राष्ट्रियसभाको सोमबारको कार्यसूचीमा अविश्वासको प्रस्ताव पनि समावेश छ । विपक्षी दलको नेताले अपराह्न ४ बजे पेस गर्नेछन् । छोटो बहस पछि, प्रस्ताव निर्णयार्थ पेश हुनेछ ।