हामी सबैकाे संसारन्यूज

काठमाडौं । आई.एम.ई.लाइफ इन्स्योरेन्स कम्पनीको चौंथो वार्षिक साधारणसभा सम्पन्न भएको छ । कम्पनीले आफ्नो चौंथो वार्षिक साधारणसभा बुधबार काठमाण्डौंको होटल र्याडिसनमा सम्पन्न गरेको हो ।

सो सभामा आर्थिक वर्ष २०७६/०७७ को सञ्चालक समितिको प्रतिवेदन सहित वित्तिय विवरणहरु पारित गरिएको कम्पनीले जनाएको छ । यसैगरी सञ्चालक समितिको निर्वाचन गरी नयाँ सञ्चालक समितिको गठन भएको कम्पनीले जनाएको छ । कम्पनीका अनुसार कम्पनीमा सर्वसाधारणलाई छुट्टाइएको शेयर जारी गर्ने प्रस्ताव पारित गरी आई.एम.ई.लाइफ इन्स्योरेन्स कम्पनी लिमिटेड र अन्य कुनै जीवन बीमा कम्पनी गाभ्न गाभिन वा प्राप्ति गर्ने सम्बन्धी आवश्यक सम्पूर्ण कार्य गर्न संचालक समितिलाई अख्तियारी प्रदान गर्न स्वीकृत गरिएको छ ।

कम्पनीका सञ्चालक समितिका अध्यक्ष डा.रामहरि अर्यालले सभालाई सम्बोधन गर्दै बीमा व्यसायमा पर्याप्त जनचेतनाको अभाव, दक्ष जनशक्तिको अभाव र बीमा व्यवसाय सम्बन्धी साक्षरताको अभाव रहेको बताए । उनले कम्पनीले यस बिषयलाई अवसरको रुपमा लिई बीमा सम्बन्धी जानकारी, जनचेतना र बीमाको पँहुच न्यून भन्दा न्यून आय स्रोत भएका जनमानसमा समेत पुर्याउन कटिबद्ध रहेको बताए । उनले आगामी दिनमा कम्पनीका सेवाहरु अझ चुस्त, छिटो छरितो रुपमा उपलब्ध गराउन प्रविधिमा विशेष जोड दिइने प्रतिबद्धता समेत जाहेर गरे ।