हामी सबैकाे संसारन्यूज

गोठालो काशिराम, ढकारी, अछाम

१
जब कसैको सामु आफ्नो बेइज्जत, हुन्छ
नयन रसाउन थाल्छन् मन भतभत, हुन्छ
यो जिन्दगी जिउन पनि के नै रहेछ चाहिने
जे थोक आफुसंग छैन उसैको जरुरत, हुन्छ

२
यो प्रकृति हुँदासम्म दुनियाँ, हुँदासम्म
उम्रेको हुन्छ बिरुवा बियाँ, हुँदासम्म
हेर मान्छे मान्छे बिचको सम्बन्ध पनि
बनेको हुन्छ केवल रुपियाँ, हुँदासम्म

३
दुःखहरु त थपिदै जान्थे झन, ऊ बेलामा
नयन रसाउथे रुन्थ्यो यो मन, ऊ बेलामा
यो जिन्दगी अभावै अभावमा हुर्केको हो
पेटभरि पाको होइन भोजन, ऊ बेलामा

४
गर्नुपर्छ कडा अभिनय, देखाउनु पर्छ
हुनुपर्छ आफ्नो विजय, देखाउनु पर्छ
कुरा काटेर खुट्टा तान्ने ती दुष्टहरूलाई
आफुले आफ्नो समय, देखाउनु पर्छ

५
आएको हुन्छ उदासी पन, किस्ता किस्तामा
कुन्नि किन दुख्छ यो मन, किस्ता किस्तामा
खुशीलाई धितो राखी जिउनु पर्छ साहेब
पीडाहरु त आइ रहन्छन्, किस्ता किस्तामा