Sansar News
अमेरिका । अमेरिका नेपाल सोसाइटी (एएनएस) को अध्यक्षमा सुजित अर्याल चयन भएका छन् ।
एएनएसकी अध्यक्ष तथा सामाजिक अभियन्ता प्रभा भट्टराई देउजाको कार्यकाल समाप्त भएपछि नयाँ अध्यक्षमा अर्याल चयन भएका हुन् ।
उत्तर अमेरिकाकै सबैभन्दा जेष्ठ सामाजिक संस्था अमेरिका नेपाल सोसाइटी(एएनएस)ले थुप्रै कामहरु गर्दै उदाहरणीय संस्था बन्न सफल भएको छ ।
गत आइतबार भर्जिनियाको फेयरफ्याक्समा सम्पन्न समारोहमा विभिन्न संघ÷संस्थाका प्रतिनिधि, आमन्त्रित समुदाय सदस्यहरुको उपस्थितिमा नयाँ कार्यसमितिको घोषणा गरिएको हो ।
कार्यक्रममा निर्वाचन समितिका प्रमुख आयुक्त डा. श्याम कार्कीले नयाँ पदाधिकारीहरुको नामावली घोषणा गरेका हुन् ।
निर्वाचन आयुक्तका कार्कीका अनुसार नयाँ कार्यसमितिमा अध्यक्ष पदमा सुजित अर्याल, प्रथम उपाध्यक्षमा जील स्कोनिज्का, द्वितीय उपाध्यक्षमा निलु उप्रेती खरेल, महासचिवमा आशिष भडेल, सचिवमा सोभिता ढुंगेल, कोषाध्यक्षमा राकेश ढुंगेल तथा संचार संयोजकमा अर्जुन दाहाल मेम्बर्स एट लार्ज सदस्यहरुमा निरञ्जन अधिकारी, प्रकृति देउजा, रुपेश खाती, लिना श्रेष्ठ मेनोन तथा अर्बिना श्रेष्ठ चयन भएका छन् ।
कार्यक्रममा देउजाको कार्यकालमा योगदान पुर्याउने तथा निस्वार्थ र निशर्त रुपमा काम गर्ने स्वयम सेवकहरुलाई प्रमाणपत्र दिएर सम्मान गरिएको थियो ।
अध्यक्ष देउजाले आफूले प्रतिबद्धता गरे अनुसार अमेरिकी संघीय सरकार र काउन्टी लगाय संग सिधै काम गर्ने अवसर मिलेको र ठूलो सहयोग प्राप्त भएको बताउँदै अब एएनएस संघीय सरकार र काउन्टीमा स्थापित भएकोमा गर्व लागेको बताइन् । साथै आफ्नो कार्यकालमा सहयोग सबै वर्ग तथा बिशेष युवाहरुले गरेको योगदान निकै प्रशंसनीय रहेकोमा मुक्त कण्ठले प्रशंसा गरिन् र कृतज्ञ रहेको बताइन् ।
वि.सं.२०७९ जेठ १२ बिहीवार ०७:५२ मा प्रकाशित
