हामी सबैकाे संसारन्यूज

उत्तम विचार, काठमाडौं

माटामा छरी पसिना दाना उब्जाऊँ अनाज
आयात मात्र गरेर देश के उठ्छ समाज ।
सहर बस्ती सुगम बने खारेर पहाड
प्रक्रिति स्वयम् मासियो भने रहन्न बहाड ।। १।

हरियो वन नेपाली धन हरायो उखान
जरुवा सुके इनार कुवा पानीका मुहान ।
महल ठुलो भएर मात्र हुँदैन भव्यता
मासेर आफ्नो सम्पदा ज्युँदो रहन्न सभ्यता ।।१।

चस्केर दुख्छ सीमाको घाउ बल्झिन्छ बेसरी
रिपुले आई कुल्चिन्छ छाती सहनु के गरी ।
जाऊँ म घुम्न विश्वमा जहाँँ सम्झिने धारो छ
आँगन आफ्नो बिर्सनु कहाँ नेपाल प्यारो छ ।।३।

हुने छ जित लगाऊँ प्रीत नेपाली माटोमा
बोकेर झोला विदेशतिर हुइँकिनु साटोमा ।
पारेर पोको समस्या बढ्छ भेटिन्न निकास
फुकाई पोको गरेमा हल हुनेछ विकास ।।४।

सगरमाथा हिउँले ढाके देखिन्छ सुन्दर
नभए हिउँ त्यो कालो पहाड देखिन्छ पत्थर ।
नेपाललाई मुटुमा राखी छातीमा सजाऊँ
अप्सरा आई गर्ने छन् न्रित्य भूस्वर्ग भनाऊँ ।।५।
छन्द : झ्याउरे