हामी सबैकाे संसारन्यूज

ओमानका लागि नवनियुक्त नेपाली राजदूत डोरनाथ अर्यालले नेपाली राजदूतावास मस्कटमा पदभार ग्रहण गरेका छन् । राजदूत अर्याले २०७९ श्रावण ५ गते दूतावासमा आयोजित संक्षिप्त कार्यक्रमबीच पदभार ग्रहण गरी आफ्नो कार्य प्रारम्भ गरेका हुन् ।

उक्त संक्षिप्त कार्यक्रममा यस दूतावासका कूटनीतिक तथा स्थानीय कर्मचारीहरूले राजदूतलाई स्वागत गरेका थिए भने नियोग उपप्रमुख सोमेश थापाले दूतावासको कामकार्यवाही सम्बन्धी छोटकरीमा उल्लेख गरेका थिए । राजदूत अर्यालले सेवाग्राहीको सर्वोपरी हितमा केन्द्रित रहेर दूतावासको सेवाप्रवाहलाई आवश्यकता अनुरूप थप चुस्त बनाउन निर्देशन दिंदै आगामी दिनमा नेपाल-ओमानबीचको सम्बन्धलाई थप मजबुत बनाउँदै उपलब्ध स्रोत र सम्भावनाहरूलाई नेपाल र नेपालीहरूको हितमा काम गर्ने बताए ।

 ओमानको परराष्ट्र मन्त्रालयका शिष्टाचार महाशाखाका कर्मचारी, मस्कटस्थित अन्य राजदूतहरू एवम् कूटनीतिक कर्मचारीहरू र नेपाली दूतावासका कर्मचारीहरू तथा नेपाली सोसल क्लब ओमानका अध्यक्ष लगायत अन्य सदस्यहरूले राजदूत रहित उनका परिवार श्रीमती स्वदेश अर्याल र छोरा नोबलश्री अर्याललाई मस्कट अन्तर्राष्ट्रिय विमानस्थलको अति विशिष्ट कक्षमा स्वागत गरेका थिए ।