हामी सबैकाे संसारन्यूज

शिव अधिकारी, ‘इलामे जेठो’  इलाम

(१)
नजरभरी रोषै रोष छ, कहाँ हुन्छ उन्नति ?
गन्तब्यमा झोसै झोस छ,कहाँ हुन्छ उन्नति ?
मुलुकलाई समृद्धिमा, लान्छु भन्ने को नि,
आधा पागल आधा होश छ, कहाँ हुन्छ उन्नति ?

(२)
कर्तव्य मै अडिग रहौं,नचुकौं न बिन्ती ।
दुश्मनका सामु कहिल्यै, नझुकौं न बिन्ती !
आकाशतिर फर्की थुक्ता, ब्यर्थै आफ्नो मुहार,
अनाहकमै फोहोर बन्छ, नथुकौं न बिन्ती ।

(३)
आफू संयम भएपछि,पक्कै मिल्छ झगडा ।
सधैं शान्त रहेपछि, पक्कै मिल्छ झगडा ।
दम्पतीमा ठाक्क ठुक्क,हुन सक्छ तर,
पलङ्गमा गएपछि,पक्कै मिल्छ झगडा ।

(४)
रङ्गी चङ्गी सजाएर, आउँदैन दसा ।
एक अर्कामा दँजाएर,आउँदैन दसा ।
होसगरी बस अब, आइपुगेँ भन्दै,
बाजागाजा बजाएर,आउँदैन दसा।

(५)
म एउटा घरको भएँ, तिमी अर्कै घरकी भयौ ।
म एउटा थरको भएँ, तिमी अर्कै थरकी भयौ ।
तिम्रो मेरो एक दिनको, झ्याप्प लगन छोपाइले,
म तिम्रो भरको भएँ, तिमी मेरी भरकी भयौ ।