हामी सबैकाे संसारन्यूज

काठमाडौं । मंसिर ४ गते हुने प्रदेशसभा र प्रतिनिधिसभा निर्वाचनमा तालमेल गरेर जाने निर्णय गरेका दलहरुले सिट बाँडफाँट टुंग्याउने तयारी गरेका छन् । दलहरुले कार्यदलले तय गरेको आधारअनुसार बाँडफाँट टुग्याउन लागेका हुन् । दलहरुको छुट्टाछुट्टै र संयुक्त बैठक बस्नेछ ।

कांग्रेसका एक नेताले बताएअनुसार गठबन्धनका शीर्ष नेताहरुको बैठक ५ बजेदेखि बस्नेछ । यसअघि दलहरुले आन्तरिक छलफल गरिरहेका छन् । बुधबार बिहान मात्रै कांग्रेसका शीर्ष नेताहरु सिट बाँडफाँटबारे आन्तरिक छलफलमा जुटेका थिए ।

प्रतिनिधिसभाको १६५ र प्रदेशसभाको ३३० सिटमै तालमेल गरेर जाने निर्णय दलहरुले यसअघि नै गरिसकेका थिए । तर, तालमेलको निर्णय गरेपनि कुन दलको भागमा कति पर्ने भन्ने विषय पेचिलो बन्दै आएको छ ।

प्रतिनिधिसभाको १६५ सिटमध्ये कांग्रेस एक्लैले न्यूनतम १०० सिटमा दाबी गरेको छ भने माओवादी केन्द्रले ६० सिटमा दाबी गरेको छ । यता, अहिलेको गठबन्धनमा निर्णायक शक्ति देखिएको एकीकृत समाजवादीले पनि ४० सिटमा दाबी गरेको छ ।

स्थानीय चुनावमा चौथो दल बनेको जसपाले पनि ३५ सिट आफुले पाउनुपर्ने अडान राखेको छ ।

१६५ सिटका लागि दलहरुले प्रस्तुत गरेको दाबी सिट संख्या भने २३५ भन्दा बढी छ । यस्तोमा दलहरुबीच सहमति जुटाउन सकस देखिन्छ ।

माओवादी केन्द्रले २०७४ को प्रतिनिधि सभा निर्वाचन र अहिलेको स्थानीय चुनावलाई मापदण्ड बनाउनुपर्ने प्रस्ताव राखेको छ भने कांग्रेसले स्थानीय चुनावलाई मात्रै आधार बनाउन खोजेको छ । जसका कारण दलहरुबीच बाँडफाँटको विषय सकसपूर्णं बन्दै गएको छ ।

सिट बाँडफाँटमा कुरा नमिले एक्लाएक्लै लड्ने तयारी पनि दलहरुले आन्तरिक रुपमा गरेका छन् । माओवादी केन्द्र र एकीकृत समाजवादीका नेताहरुको पछिल्लो अभिव्यक्ति एक्लै लड्ने कोणबाट पनि आएको छ । तथापी, आजको बैठकबाट सकेसम्म सहमति गर्ने प्रयास दलहरुले गर्ने तयारी गरेका छन् ।