हामी सबैकाे संसारन्यूज

लक्ष्मी स्मृति, बिराटनगर

१
हल्ला गर्छन् तिस दिनदेखि तिज आएको रे
बल्लबल्ल साथीसंगी सब भेट्न पाएको रे
ठूलो स्वरमा गाना, बजाना नृत्य उस्तै अस्लिल
बियरसँग मासुको सितन दर खाएको रे ।

२
कसैलाई रमाईलो त कसैलाइ पिलो बनेको छ
त्यति शुन्दर चाड, संस्कृति थिल्थिलो बनेको छ
तिस दिन अघि देखि दर खानेलाई त राम्रै होला
नहुनेलाई भने तिज खुब भड्किलो बनेको छ ।

३
नजरको ईशारा, बेग्लै छ हाउभाउ के बताको हो
देखाएर तिघ्रा, पड्काउँदै जिब्रो सफर कताको हो
हामी पनि बुझिदिए देखि पिरती गाँस्थ्यौँ रमाएर
आँखै अघिबाट काटेर बाटो किन पो सताको हो ?

४
भएको लाजै पचाएर तलतिर झर्न मिल्छ र
गाईबस्तु चरे जस्तै दश दिशा चर्न मिल्छ र
समाज,संस्कृति, मर्यादा सबैलाई चट्टै बिर्सेर
कथाले माग्यो भन्दैमा जे पनि गर्न मिल्छ र ?

५
केटाकेटी झैँ उदण्डपना जगाएर के पाईन्छ
गोहिको जस्तै आँशु घना बगाएर के पाईन्छ
डुब्दा सबै डुब्ने हो नसम्झे हुन्छ म ओभानो छु
अर्कालाई फगत लाञ्छना लगाएर के पाईन्छ ?