हामी सबैकाे संसारन्यूज

राजेन्द्रकुमार बज्राचार्य, काठमाडौं

मनका सपना अनेक छन्, सबल जिन्दगीको ।
सपना मनको प्रवेशमा,अटल बन्छ है त्यो ।।
सपना नरको प्रतीक होस्, प्रगतिशील भाव ।
धनमा मनको लगाव होस्, कति नहोस् अभाव ।।१।।

सपना नरहे त जिन्दगी, कठिन हुन्छ बाँच्न ।
सपना सब ती मियो बनी, सब अगाडि जोड्न ।।
जब जीवनयन्त्र बन्छ यो, अब सदैव मोड्न ।
परिवर्तन हुन्छ जिन्दगी, प्रगति मार्ग हिड्न ।।२।।

जब जीवनको प्रकाश भै, ल जगमा उदाई ।
सबको मनमा निबास भै, ढुकढुकी जनाई ।।
सपना जब जिन्दगी रहे, सुपथको छनौट ।
कति जीवन उच्च बने यहाँ, प्रगतिको बनौट ।।३।।

जब जीवन लक्ष्य बने यहाँ, अवनिको छ यात्रा ।
जब पूर्ण बनेर खडा भए, हर प्रभाव मात्रा ।।
सपना जपना बिपना बने, मनुजको प्रभात ।
ममता जगमा नि पलाउँला, तनुजको छ बात ।।४।।

छन्द : अतिशायिनी
गणः स स ज भ ज गु गु
संकेतः ।।ऽ ।।ऽ ।ऽ। ऽ।। ।ऽ। ऽ ऽ
यतिः १० अक्षरमा ।