हामी सबैकाे संसारन्यूज

ममता मृदुल, विराटनगर

स्कुल अगाडि धेरै भीड छ । नारा लगाइरहेका केटाकेटीलाई देखे । के भएको रहेछ भनेर भीडलाई छिचोल्दै पसेँ । विवशसरलाई कारबाही गर भनेर अभिभावक चिच्याइ रहेका थिए । माइक बोकेको केटाको छेउमा गएँ, ‘मलाई पनि बोल्न दिनु ल भाइ’, भन । खुसी हुँदै भन्यो, ‘हुन्छ दिदी एकछिन पछि तपाईंको पालो आउँछ ।’ कुरा के रहेछ बुझे । मेरो पालो दुई जनापछि आयो ।

‘शिक्षकले काँचो माटोको डल्लोलाई आकार दिनुपर्छ । इमानदार बन्न सिकाउनुपर्छ । देशका कर्णधार जन्माउने शिक्षक हुनुपर्छ । सबैको गल्ती क्षमागर्न सक्नुपर्छ ।’, भीडबाट परर ताली बज्यो । ‘सरकै दोष हो । कुटेर पढाउन मिल्दैन । गाली गर्न पाइदैन । बाल अधिकार थाहा हुनुपर्छ । अभिभावक सबै एकैखाले हुँदैनन् । पटक्कै पढन नमान्ने कसैगरी सुधार्न नसकेको मेरो छोरा जसलाई बाल अधिकार भन्ने थाहा भएको भए आज सफल सर्जन कहाँ हुन्थ्यो विवश सर ।’, पररर बजेको तालीसँगै भीड तितरबितर भयो ।