हामी सबैकाे संसारन्यूज

ओमकुमारी बन्जारा रानाभाट, काठमाडौं

हजुरहरू नेपालमा घुम्न आउनु होला
प्रकृतिकी सुन्दर परी नेपाल पाउनु होला
पशुपति दर्शन गरौँ आशिष् दिनुहुन्छ
आइपर्ने दुःख कष्ट सारा विलीन हुन्छ ।

भक्तपुरमा हेर्न मिल्छ कलाकौशल राम्रो
साँस्कृतिक सम्पदाको भण्डार नेपाल हाम्रो
मनकामना दर्शन गरौँ केवुलकार चढी
हेटौँडामा घुमौँला है मकवानपुर गढी ।

पोखराको बजार घुम्न टुरिष्ट बसमा जाउँला
पोखरेली चामलको मीठो भात खाउँला
तालवाराही दर्शन गर्न डुङ्गा चढी जान्छौँ
धूप अक्षता नरिवल पूजा गर्न लान्छौँ ।

जोमसोमदेखि मुक्तिनाथ घोडा चढी जाऊँ है
फर्किँदा त मीठो बतास खाँदै खाँदै आऊँ है
पाल्पा जाम्ला मिनी बसमा भजन कीर्तन गर्दै
हृदयको बगैँचामा मायाप्रीति छर्दै ।

राराताल घुम्नुपर्छ तातो लुगा लाऊँला
सगरमाथा शिखरमा चढ्न सँगै जाऊँला
हिमाल पहाड तराईमा नेपाली छ भाषा
नेपाली छन् सबै साथी सहयोगी खासा ।