हामी सबैकाे संसारन्यूज

कम्पाला । विश्व स्वास्थ्य सङ्गठन (डब्लुएचओ)ले युगान्डाका खडेरी र खाद्य असुरक्षाको सामना गरिरहेका जिल्लामा प्रयोग गर्ने गरी ११ लाख अमेरिकी डलरभन्दा बढीको स्वास्थ्य सामग्री प्रदान गरेको छ ।

शुक्रबार सोबारे ट्वीट गर्दै सङ्गठनले उक्त सामग्रीको आपूर्तिले कारामोजा, लांगो, टेसो क्षेत्रका २० जिल्लामा खडेरी र खाद्य असुरक्षाको स्वास्थ्य प्रभावलाई सम्बोधन गर्न सहयोग गर्ने जनाएको छ ।

“यो सहयोगले स्वास्थ्य सुविधा र सामुदायिकस्तरमा औलो, मातृ, नवजात, बाल स्वास्थ्य, पोषण, क्षयरोग र एचआईभी लगायतका अत्यावश्यक स्वास्थ्य सेवाको निरन्तरता सुनिश्चित गर्ने लक्ष्य राखेको छ,” डब्लुएचओ कार्यालयका घटना प्रबन्धक चार्ल्स न्जुगुनाले उल्लेख गरेका छन् ।

स्वास्थ्य मन्त्री रुथ एसेङ्गले देशले सामना गरिरहेको इबोला प्रकोप बाहेक युगान्डाको जीवनलाई खतरामा पार्ने अन्य स्वास्थ्य आपतकाल पनि रहेको बताइन् । एसेङले डब्ल्यूएचओको सहयोगले प्रभाव विरुद्धको लडाइलाई बलियो बनाउन मद्दत गर्ने बताएका छन् । (रासस–सिन्ह्वा)