Sansar News
सीता शर्मा ’शीत’, सिक्किम, भारत
खुशी र प्रेमको कतै बहार हुन्छ जिन्दगी,
व्यथा र दर्दले कसैको भार हुन्छ जिन्दगी,
फरक यहाँ व्यथा सबै कहानी भिन्न भिन्न छन्,
नपाई भेट्न लक्ष्य नै किनार हुन्छ जिन्दगी,
कतै छ जन्मको खुशी, कतै विवाह भोज रे
र रोगले कतै त लम्पसार हुन्छ जिन्दगी
लिएर साथ आइयो त जन्मदा मरण पनि,
भुलेर स्वार्थ प्राप्तिकै हतार हुन्छ जिन्दगी,
न धर्म कर्म क्यै भयो, न मार्ग मोक्षको मिल्यो,
सदैव रम्न मोजमा तयार हुन्छ जिन्दगी
बहर : हजज मुसम्मन मकबुज
अर्कान : १२१२ १२१२ १२१२ १२१२
वि.सं.२०७९ पुस २ शनिवार ०८:३५ मा प्रकाशित
