काठमाडौं । नेकपा एकीकृत समाजवादीका अध्यक्ष माधव कुमार नेपालले गठबन्धनभित्रका दलहरुमा अहंकार पलाए आफुहरु जस्तोसुकै स्थितिको समना गर्न तयार रहेको चेतावनी दिएका छन् ।
सोमबार पार्टीका तर्फबाट निर्वाचित सांसदहरुलाई बधाई तथा शुभकामना दिन आयोजना गरिएको कार्यक्रममा अध्यक्ष नेपालले यस्तो कुरा बताउँदै गठबन्धनलाई निरन्तरता दिन आफुहरु तयार रहेको तर दलहरुमा कुनैपनि अहंकार देखिए आफुहरु सामना गर्न तयार रहेको चेतावनी दिएका हुन् ।
‘हामीले अहिलेकै गठबन्धनलाई कायम राख्ने छौं । गठबन्धन दलका नेताहरुले संगसँगै जाने सहमति पनि गरेका छौं । तर, गठबन्धनभित्रकै दलहरुका नेताहरुमा अहंकार पलाउँछ भने हामी जस्तोसुकै स्थितिको सामना गर्न तयार छौं ।’नेता नेपालले सम्बोधनका क्रममा भने ।
मंसीर ४ गते सम्पन्न प्रतिनिधि सभा र प्रदेश सभा निर्वाचनमा प्रत्यक्षमा १० सिट जित हासिल गरेको एकिकृत समाजवादीले नयाँ सरकार गठनबारे गठबन्धनभित्र भइरहेको छलफलमा मुख्य पाँच पद मध्ये कुनपनि एक पदमा आफ्नो दावी गर्दै आएको छ ।
वि.सं.२०७९ पुस ४ सोमवार १४:३४ मा प्रकाशित
