हामी सबैकाे संसारन्यूज

उत्तम विचार, काठमाडौं

बुनेर फैलिँदा जालो भ्रष्टाचारी स्वदेशमा
छेडेर युद्ध निस्कन्थे सदाचारी भए यहाँ ।
कुटेझैँ गर्छ यौटाले अर्को गर्छ दुखेसरि
शृङ्खलावद्ध नौटङ्की रोकिएन कसैगरी ।।१।

लुछेझैँ गिद्धले मासु लुछ्दछन् देशको मिली
भरिन्न पेटझैँ गर्छन् सिङ्गो भन्डार नै निली ।
दुधको तर मार्ने छन् यत्रतत्र सरोबरी
बिरालो ढुक्छ भान्साको पहरामा बरोबरी ।।२।

ऐया अत्था भनी आमा चिच्याई छन् भने पनि
फुटेका कान सुन्दैनन् हेर्दछन् रमिते बनी ।
मूर्खको ओखती छैन भए तैँ भनिदे चरी
होला यो देशको रक्षा कहाँ गएर के गरी ।।३।

शिर पुच्छर जोडेर चोचोमोचो मिलाउँंछन्
उध्रेको छिद्र देख्दैनन् नयाँ वस्त्र सिलाउँछन् ।
ढलको छेउमा रोपी बास्ना चल्दैन बाबरी
कोदो रोपेर फल्ला र खेतमा धान बेसरी ।।४।

छैनन् चिन्तक चिन्ताले भेटिए ग्रस्त शासक
कोही त जन्मिए हुन्थ्यो देशमा पुज्न लायक ।
चोला पाइन्न मान्छेको यदि मिल्छ भने मरी
सेवा निमित्त आमाको मलाई जन्म दे हरि ।।५।
छन्द सूत्र : अनुष्टुप्