हामी सबैकाे संसारन्यूज

काठमाडौं । सत्ता साझेदार दलहरु मन्त्रालय बाँडफाँटको मोडालिटीमा सहमति नजिक पुगेका छन् । दलहरुबीच मुख्य मन्त्रालयबारे करिब सहमति बनेको बताइएको छ । मुख्य मानिएका मन्त्रालय एउटै पार्टीले नलिने सहमति दलहरुका बीच भएको छ ।

बताइएअनुसार सत्ताको नेतृत्वकर्ता माओवादी केन्द्रले गृह मन्त्रालय र नेपाली कांग्रेसले अर्थ मन्त्रालय लिने गरी करिब सहमति बनेको छ । यस्तै, नटुंगिएको भएपनि भौतिक पूर्वाधारमा एकीकृत समाजवादीले दाबी गरेको छ ।

प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल प्रचण्ड, कांग्रेस सभापति शेरबहादुर देउवा र एकीकृत समाजवादीका अध्यक्ष माधवकुमार नेपालका बीचमा सरकार विस्तारबारे भएको प्रारम्भिक छलफलमा मोडालिटीबारे सहमति बनेको हो । तर, अन्य दलसँग छलफल नभई नटुंगिने बालुवाटार स्रोतले जनाएको छ ।

दलहरुका बीच महत्वका आधारमा मन्त्रालय बाँडफाँट गर्ने तयारी भइरहेको बालुवाटार स्रोेतले बताएको छ ।

एमाले, राप्रपा र रास्वपा सरकारबाट बाहिरिँदा अधिकांश मन्त्रालय रिक्त छन् । मुख्य मानिएकै मन्त्रालय रिक्त हुँदा सरकारको नियमित कामसमेत प्रभावित बनेको छ ।

यस्तोमा दलहरुबीच प्रधानमन्त्री प्रचण्डले विश्वासको मत लिएलगत्तै सरकार विस्तार गर्ने तयारी छ । प्रधानमन्त्रीले सोमबार प्रतिनिधिसभाबाट विश्वासको मत लिँदैछन् । दलहरुबीच लगत्तै सरकार विस्तार गर्ने तयारी भएको छ ।

शनिबार बसेको १० दलीय बैठकले प्रधानमन्त्रीलाई विश्वासको मत दिने र सत्यनिरुपण तथा वेपत्ता आयोगसँग सम्बन्धित विद्येयकलाई फास्ट ट्रयाकबाट अगाडि बढाउने सहमति भएको थियो ।