Sansar News
प्रमोद भट्टराई ’प्रतीक’, कौशलटार, भक्तपुर
१.
मौसम जस्तो सजिलो हुँदैन भविष्यको अनुमान
समस्या पर्दा कहाँ भेट्नु ? सहयोग गर्ने हनुमान ।
२.
पौरख भए पो देखाउनु त्यही शक्ति त हो देखाउने
जनता भए खेलौना जसले सक्छ उसैले खेलाउने ।
३.
कागजमा बजेट कोर्छन् खल्ती भर्छन् पिट्छन् डङ्का
कान चिरिएको देख्दै लाग्थ्यो गर्दैनन् भन्ने शङ्का ।
४.
एउटा कुर्सी छ तिनचार जना मिल्छन् घुम्ने मेच खेल्छन्
जनता रमिते मात्रै भए उल्टो दुवैतिरकाले पेल्छन् ।
५.
हे पशुपति नाथ ! लौ न कृपा गर तिम्रै त हो यो कैलाशको देश
तिम्रो जलहरीमा नै आँखा गाडे, खोल त्रिनेत्र देखाउ रौद्र भेष ।
वि.सं.२०८० साउन ६ शनिवार ०७:४९ मा प्रकाशित
