हामी सबैकाे संसारन्यूज

काठमाडौं । साताको अन्तिम कारोबार दिन बिहीबार झिनो अंकले बढ्दै सेयर बजार बन्द भएको छ । बिहीबार ५.१३ अंकले बढ्दै २०६६.०५ को बिन्दुमा उक्लिएको छ । बजार समग्र ०.२४ प्रतिशतले बढेको छ ।

झिनो अंकले बढेपनि कारोबार रकम भने यसअघिका दिनमा भन्दा उच्च रह्यो । बिहीबार ५५ लाख तीन हजार २१ कित्ता सेयर किनबेच हुँदा दुई अर्ब १५ करोड ६५ लाख रुपैयाँ बराबरको कारोबार भयो ।

बिहीबार सोल्टी होटल, माथिल्लो तामाकोशी, शिवम् सिमेन्ट, आइएमइ लाइफ इन्स्योरेनस, एसटिसीलगायतको कारोबार उच्च रह्यो । झिनो अंकले बजार बढ्दो पनि अभियान लघुवित्त, सिंगटी हाइड्रो, स्वेत गंगा, सोल्टी होटललगायतको मूल्यमा उच्च बृद्धि भएको छ ।

कारोबारमा आएका २२२ कम्पनीमध्ये १०५ कम्पनीको मूल्य बढ्यो भने १०८ कम्पनीको मूल्य घट्यो । नौ कम्पनीको मूल्य भने स्थिर रह्यो ।

यसअघिका दिनमा जस्तै होटल तथा पर्यटन, निर्जीवन बिमा क्षेत्रका कम्पनीका केही उत्साह देखिए ।