हामी सबैकाे संसारन्यूज

काठमाडौं । नेपाली कांग्रेसका महामन्त्री तथा सांसद गगन थापाले एनसेलको सेयर स्वामित्व खरिद विक्रिमा राजनीतिक र प्रशासनिक नेतृत्वको मिलेमतो रहेको आरोप लगाएका छन् ।

प्रतिनिधिसभाको राज्य व्यवस्था समितिमा बोल्दै उनले एनसेलको स्वामित्व खरिद विक्रि रातारात नभएको भन्दै राजनीतिक तथा प्रशासनिक नेतृत्वको ठूलो साठगाँठ भएको आरोप लगाए ।

‘एनसेलको सन्दर्भमा जे कुरा भएको छ, रातारात भएको होइन, राजनीतिक नेतृत्व र प्रशासनिक नेतृत्वको ठूलो साठगाँठ, ठूलो भरथेग, ठूलो भरोसा नभई यो कुरा भएको छैन’ थापाले भने ।

मलेसियाली कम्पनी आजियताले आफ्नो भागमा रहेको एनसेल कम्पनीको सेयर स्पेक्ट्रलाइट युके लिमिटेडलाई ५ करोड डलरमा बिक्रि गरेको सार्वजनिक भएपछि उक्त कारोबार अविस्वसनिय रहेको र त्यसको छानिवन गर्नुपर्ने भन्दै आवाज उठिरहेको छ ।

यस सम्बन्धमा नेपाल दूरसंचार प्राधिकरणले आजियटासँग कागजात पठाउन माग गर्दै पत्र काटेको छ भने आजियटाले सम्बन्धीत कागजात उपलब्ध हुनासाथ प्राधिकरणलाई पठाउने जवाफ दिएको छ ।

त्यसैगरी सरकारले पनि यसको छानविनका लागि पूर्वमहालेखापरीक्षक टंकमणि शर्माको नेतृत्वमा समिति गठन समेत गरेको हो ।

प्रधानमन्त्री कार्यालयका कानुन हेर्ने सचिव फणीन्द्र गौतम, अर्थ मन्त्रालयका सहसचिव रितेश शाक्य, सञ्चार मन्त्रालयका सहसचिव बाबुराम भण्डारी र नेपाल चार्टर एकाउन्टेन्ट संस्था (आइक्यान)का अध्यक्ष सुजनकुमार काफ्ले पनि समिति सदस्य रहेका छन् । समितिलाई एक महिनाभित्र प्रतिवेदन दिनेगरी कार्यादेश दिइएको छ ।