हामी सबैकाे संसारन्यूज

अरुण खडका, काठमाडौं

१.
बिहानैदेखि बालुवाको भारी बोकेर आमा
निदाउँनै सक्दिनन् रातभरि खोकेर आमा
नदुःखेझैं छाती छरिरहन्छिन् मलिन हाँसो,
वेदनाको ज्वालामुखी दिलमै रोकेरआमा ।

२.
मेरो सरकारले तिम्रो विश्वासको मत पायो भने
अविश्वासको प्रस्तावले सहजै मात खायो भने
गृह मन्त्रालयको बागडोर नै सुम्पिदिउँला प्रिया,
तिम्रो धड्कनले मेरो समर्थनमा नारा लायो भने ।

३.
बरफ जस्तै पग्लिएर पानी पानी हुन मन छ
प्रिया तिम्रा अधरमा जानी जानी छुन मन छ
गुमाएर नियन्त्रण काम क्रोध मोह लोभमा,
प्रेमरसले तिम्रो वदन मनोमानी धुन मन छ ।

४.
पिउने पानी पाइन्न रे उता सारा प्यास यतै मेटौँला
रगत पसिना र जवानी रित्याउन खाडीमा भेटौँला
श्रमको सदुपयोग र उचित मूल्यांकन नहुँदा यहाँ,
स्वयं आफैले आफ्ना सपनाहरूको घाँटी रेटौँला ।

५.
मान्दिन म रितिरिवाज तिमी धर्मका कुरा गर्छौ
बराल्लिएर हिँड्दछु म तिमी कर्मका कुरा गर्छौ
बस्नु कत्ति परिधिभित्र दुई दिनको जिन्दगीमा,
म चाहन्छु स्वच्छन्दता तिमी शर्मका कुरा गर्छौ।