२६ वैशाख, बेनी (म्याग्दी) । म्याग्दीका तीन ठूला दलका उम्मेदवारले आफूले चुनाव जितेमा बेनी नगरपालिकालाई देशकै ‘नमुना नगरपालिका’ बनाउने महत्वकांक्षी प्रतिबद्धता व्यक्त गरेका छन् ।
नजिकिँदै गरेको स्थानीय तहको निर्वाचनमा मतदातालाई आकर्षित गरी आफ्नो पक्षमा भोट माग्नका लागि नेपाली काँग्रेस, नेकपा (एमाले) र नेकपा (माओवादी केन्द्र)का उम्मेदवारले यस्तो प्रतिबद्धता गरेका हुन् ।
नेपाली काँग्रेसले बेनी नगरपालिकालाई समृद्ध र नमुना नगरपालिका बनाउनका लागि नगरपालिकाका हरेक वडामा उद्योगको स्थापना गरी रोजगारी उपलब्ध गराउने महत्वाकांक्षी योजना प्रतिबद्धता पत्रमा उल्लेख गरेको छ ।
त्यसैगरी, एमालेले बेनी नगरपालिकाका विभिन्न ठाउँमा सिटी सेन्टरको स्थापना गर्नुका साथै गोठगोठमा नै पुगेर बिरामी पशुको स्वास्थ्योपचार गर्नेसम्मको प्रतिबद्धता व्यक्त गरेको छ । त्यसैगरी, माओवादी केन्द्रले उज्यालो म्याग्दी र सुपरजोनसम्मको प्रतिबद्धता व्यक्त गरेको छ ।
कुल ७६ दशमलव ५७ वर्ग किलोमिटर क्षेत्रफलमा समेटिएको, ३३ हजार ४९८ जनसङ्ख्या र १८ हजार ३४५ मतदाता रहेको बेनी नगरपालिकालाई समृद्ध र नमुना नगरपालिका बनाउन सकिने पर्याप्त सम्भावना रहेका एमालेको तर्फबाट बेनी नगरपालिकाको प्रमुखका उम्मेदवार प्रमोद श्रेष्ठले बताउनुभयो ।
युवा पलायन र दक्ष जनशक्ति मुख्य चुनौती रहेको म्याग्दी जिल्ला र जिल्लाको केन्द्र मानिएको बेनी नगरपालिकामा अधिकांश ग्रामीणबस्ती समेटिएका छन् ।
अझसम्म पनि शिक्षा, स्वास्थ्य, सञ्चारलगायतका आधारभूत सुविधासमेत उपभोग गर्न नपाएका जनताले दलहरुका महत्वकांक्षी प्रतिबद्धतालाई ‘चुनाव जित्नका लागि काउले बोली’ भनेर अविश्वास जनाउने गरेका छन् ।
मतदाताले दल र उम्मेदवारलाई नारा र महत्वाकांक्षी प्रतिबद्धता होइन सुशासन र जनतालाई सुविधा पुग्ने खालका पत्यारलाग्दा प्रतिबद्धता व्यक्त गर्न अनुरोध गदै चुनाव जितेपछि आफूले गरेका प्रतिबद्धता नभुल्नसमेत आग्रह गरेका छन् ।
उन्नाइस वर्षपछि यही वैशाख ३१ गते सङ्घीय संरचनाअनुसार हुन लागेको स्थानीय तहको पहिलो निर्वाचनमा मतदान गर्नका लागि व्यग्र प्रतिक्षा गरिरहेका मतदाताले निर्वाचनपछि, विकासभन्दा पहिले सुशासन र जनप्रतिनिधि भएको महसुस हुनेगरी काम गर्ने उम्मेदवारलाई जिताउनु पर्ने प्रतिक्रिया दिएका छन् । रासस
