हामी सबैकाे संसारन्यूज

विदुर अधिकारी, रामपुर, चितवन

हे इच्छुक हे, क्रान्ति प्रचारक
वीर पुत्र हौ, युगका रक्षक
हौ शुभ द्रष्टा, भवका दर्पण
गर्छौँ कविप्रति, श्रद्धा अर्पण
(१)

तिम्रा लेखन–ले दिल छुन्थ्यो
सामन्तीको, झड्का दिन्थ्यो
शोषित जनका हौ शुभ धड्कन
गर्छौँ कविप्रति, श्रद्धा अर्पण
(२)

थ्यौ अति आँटी, बोल्न सिपालु
जनबिच क्रान्ति, घोल्न सिपालु
टर्दछ भन्थ्यौ बाधा अड्चन
गर्छौँ कविप्रति श्रद्धा अर्पण
(३)

तिम्रा कविता क्रान्ति उराल्थे
सुन्दा जन उत्साहित हुन्थे
सामन्तीको दिन्थ्यौ चड्कन
गर्छौँ कविप्रति श्रद्धा अर्पण
(४)

छैनौ अहिले, जगमा इच्छुक
तर ती वाणी अझ छन् सार्थक
सहिद बनाए, खलले तत्क्षण
गर्छौँ कविप्रति, श्रद्धा अर्पण
(५)

छन्द : पादाकुलक (मात्रिक)