हामी सबैकाे संसारन्यूज

काठमाडौँ । नेपाली काँग्रेसका उपसभापति धनराज गुरुङले पाँच सय र हजारका नोट प्रतिबन्ध लगाउन सरकारसँग माग गरेका छन् । बुधवार प्रतिनिधि सभा बैठकमा युवा तथा खेलकुद मन्त्रालयको विनियोजित बजेटमाथिको छलफलमा भाग लिँदै उपसभापति गुरुङले यस्तो माग गरेका हुन् ।

मुलुकमा आर्थिक सुशासन कायम गर्ने हो भने सरकारले पाँच सय र एक हजारको नोट प्रतिबन्ध लगाउनुपर्ने उनको जोड थियो ।
उनले भने, ‘आर्थिक सुशासनका लागि मेरो प्रस्ताव हो । सरकारमा बसेका साथीहरूलाई यो निवेदन गर्न चाहन्छु कि आजको दिनमा आर्थिक सुशासन कायम गर्ने हो भने हामीले पाँच सय र हजारको नोट क्विट गरेर जान आवश्यक छ ।’

उनले ती नोटहरू प्रतिबन्ध गरेमा मुलुकमा ८० प्रतिशत भ्रष्टाचार नियन्त्रण हुने, सोही अनुपातमा गैर कानुनी कारोबार रोकिने र ८० प्रतिशत राजस्व चुहावट नियन्त्रण हुने दाबी गरेका छन् । उनले अवैध रूपमा राखिएका धनराशि पनि पाँच सय र हजारका नोटमा प्रतिबन्ध लगाएपछि बाहिर आउने बताए ।

‘यदि यी नोटहरू क्विट गर्यौं भने ८० प्रतिशत गैर कानुनी कारोबार रोकिन्छ । ८० प्रतिशत भ्रष्टाचार नियन्त्रण हुन्छ । र, ८० प्रतिशत राजस्व चुहावट नियन्त्रण हुन्छ । यसरी जाने हो नि त । अनि सिरानी मुनि भएका पैसा, खाटमुनि भएका पैसा, जमिनमुनि भएका पैसा, पानीमुनि भएका सबै पैसा बाहिर आउँछ ।’

उपसभापति गुरुङले सिरानी मुनि, खाटमुनि, जमिनमुनि र पानीमुनि भएका सबै पैसा बाहिर ल्याउनका लागि पनि सरकारले पाँच सय र हजारको नोटमा तत्काल प्रतिबन्ध लगाउन आवश्यक रहेको बताए ।