हामी सबैकाे संसारन्यूज

काठमाडौँ । जाजरकोटको कुशे गाउँपालिकामा भूकम्प पीडितको अस्थायी टहरामा पहिरो जाँदा तीन जना घाइते भएका छन् । घाइते हुनेमा कुशे गाउँपालिका–८ की ३४ वर्षीय कमला थापा, १६ वर्षीय निरमाया थापा र चार वर्षीय हस्तिका थापा छिन् ।

घाइते भएकाहरूलाई हेलिकप्टरबाट उद्धार नेपालगन्ज लैजाने तयारी भइरहेको कुशे गाउँपालिका–८, वडाध्यक्ष डिल्लीबहादुर सिंहले जानकारी दिए । सिंहका अनुसार घाइतेमध्ये हस्तिकाको अवस्था गम्भीर छ । उनको होस आउने जाने भइरहेको छ भने निरमाया थापाको दुवै खुट्टामा चोट लागेको छ ।

गए राति करिब १० बजेको समयमा उनीहरू बसिरहेको ठाउँमा पहिरो गएको थियो । पहिरो जाँदै गर्दा खुट्टामा चोट लागेकी निरमायालाई टहराबाट निकाल्ने प्रयास गर्दा छिमेकी कल्पना पनि पहिरोको चपेटामा परेको सिंहले बताए ।

गत वर्ष कात्तिक १७ गते जाजरकोट केन्द्रबिन्दु भएर गएको भूकम्पले ठुलो जनधनको क्षति भएको थियो । उक्त भूकम्पले कुशे गाउँपालिका ७, ८, ९ लगायतका वडामा क्षति पुराएको थियो । बसेको घर भूकम्पले भत्काएपछि गाउँलेहरू अस्थायी टहरामा बसिरहेका छन् ।