Sansar News
हेटौंडा । बागमती प्रदेशको मुख्यमन्त्रीमा नेपाली काँग्रेसका बहादुरसिंह लामाले दाबी पेस गरेका छन् । लामाले मङ्गलवार प्रदेश प्रमुख यादवचन्द्र शर्मा समक्ष मुख्यमन्त्रीका लागि दाबी पेस गरेका हुन् । लामालाई काँग्रेसका ३७ र एमालेका २७ गरी ६४ सांसदको समर्थन गरेका छन् ।
प्रदेश प्रमुख शर्माले मङ्गलवार साँझ पाँच बजेभित्र संविधानको धारा १६८ (२) अनुसार बहुमतको सरकार गठनका लागि आइतबार आह्वान गरेका थिए ।
मङ्गलवार साँझ पाँच बजेपछि प्रदेश प्रमुख शर्माले लामालाई मुख्यमन्त्रीमा नियुक्त गर्ने तयारी छ । नुवाकोटका लामा पहिलो पटक मुख्यमन्त्री बन्दै छन् ।
काँग्रेसले मुख्यमन्त्रीसहित ७ र एमालेले आर्थिक मामिला तथा योजना मन्त्रालयसहित छ वटा मन्त्रालय लिने सहमति भएको छ ।
बाग्मतीमा एक सय १० जना सांसद छन् । सरकार गठनका लागि ५६ सांसदको समर्थन आवश्यक पर्छ । काँग्रेस र एमालेसँग ६४ सांसद छन् । प्रदेश सभामा नेकपा माओवादी केन्द्रको २१, राप्रपाको १२ (सभामुख बाहेक), नेकपा (एकीकृत समाजवादी) को सात, नेमकिपाको तीन र हाम्रो नेपाली पार्टीको दुई सांसद छन् ।
वि.सं.२०८१ साउन ८ मंगलवार १३:१८ मा प्रकाशित
