हामी सबैकाे संसारन्यूज

कल्पना भट्टराई, टोखा काठमाडौं

मित्रको साथ होस् सर्वदा सुन्दर ।
मित्रले भर्दछन् देहमा जाँगर ।
दुःखमा हर्षमा साथ दिन्छन् सदा ।
चाहना कामना बुझ्दछन् सर्वथा ।१।

मित्र हुन्छन् कुनै बाबुझैँ मातृझै ँ।
मित्र हुन्छन् कुनै शत्रुझैँ पत्रुझैँ ।
साथ दिन्छन् कुनै हात दिन्छन् कुनै ।
हर्ष दिन्छन् कुनै दर्द दिन्छन् कुनै ।२।

मित्रमा भिन्नता देखिने गर्दछन् ।
मित्रले चित्तमा चेतना भर्दछन् ।
नेत्र बन्छन् कुनै मार्ग बन्छन् कुनै ।
कर्म बन्छन् कुनै धर्म बन्छन् कुनै ।३।

मित्रका भावना हुन् सदा कञ्चन ।
मित्रका साथमा खुल्दछन् बन्धन ।
मित्र हुन् कृष्णझैँ रामझैँ सज्जन ।
मित्र हुन् आत्मवत् हुन्न जो वर्णन ।४।

मित्र दिन्छन् सधैं सान्त्वना हारमा ।
मित्र हुन्छन् खुसी मित्रको जीतमा ।
मित्र सच्चा मिले सप्रियो जीवन ।
हुन्छ पक्कै बुझौँ चित्तको शोधन ।५।

छन्द : स्रग्विणी
गण : र र र र
सङ्केत : SlS SlS SlS SlS