हामी सबैकाे संसारन्यूज

प्रज्वल पुकार, पाख्रीबास, धनकुटा

उसले आफ्नै एक लोटी आँसु थापेर
छातीको वेदना चढाउन मन्दिर गई
खोसेर ढलमा बगाईदिए

आफ्नै स्तनहरु लुछेर
एक गिलास दूध भेला गरी
र आमाको अपमान चढाउछु भनि
खोसेर पोखिदिए
अरुले टेक्दै टेक्दै हिडे

निधार चिरेर सेतो कपडा पुरै रगतले भिजाई
र मेरो भाग्य यही चढाउछु भनि
नछुने भएकी आईमाई भन्दै
गेटबाटै लखेटी दिए

रोगी बृद्ध लोग्ने लिएर गई
र मेरो बाँकी सौभाग्य यही चढाउछु भनि
बृद्धाश्रम लैजा भनेर परैबाट खेदिदिए

ऊ आफ्नै सानो बालक छोरो लिएर गई
र मेरो बाँकी सपना यही चढाउछु भनि
अनाथालय लैजा भनेर गाली गरे

अन्त्यमा आफ्नै तरुनी छोरी लिएर गई
र मेरो बाँकी पिर यही चढाउछु भनि
सबैले धन्यवाद दिदै भित्र लगे

सुन्नोस् न पुजारी बा
इश्वरले दलितको केही दान नलिए पनि
तरुनी छोरीको जवानी त स्वीकार्दा रहेछन् नि ।