हामी सबैकाे संसारन्यूज

यम रेग्मी, दाङ

फिनी हरायो गहुँ वीज गन्छौ
टोपी छ फाट्दै सुरुवाल तुन्छौ
खस्दैछ लौटी छ कि छैन ख्याल ?
आँची छिटा छन् मुखमा पखाल ।१।

मेरो कुवामा अरु भर्छ पानी
छ खेत मेरै अरु छर्छ खानी
बन्दैछु आफ्नै घरभित्र दास
भान्सा छ मेरै अरु गर्छ राज ।२।

छ जन्त्र तिम्रो शिरमा विदेशी
कालो निशामा खुब हुन्छ खेती ?
फालीविना जोतिरहेछ कोही
पीडाविनै रोइरहेछ गोही ।३।

बलो नराखी घर छाइदैछ
माटो नराखी वर लाइदैछ
चाहिन्छ बोक्रा रुख बाच्नलाई
फल्दैन काक्र्रो लहरा चुडाई ।४।

विवेक कस्तो सब पर्छ ढङ्ग
उल्टो फुकेको किन हो नि शङ्ख ?
देखिन्छ खोले पछि नग्न आङ
मासिन्छ फूले पछि बाँस झाङ ।५।

छन्द :उपजाति (इन्द्रवज्रा + उपेन्द्रवज्रा)
गण : त त ज गु गु
सङ्केत : SSI    SSI  ISI  S S
विश्राम : पाँच अक्षरमा